ສູນສົ່ງເສີມ ແລະ ຖ່າຍທອດ ເຕັກໂນໂລຊີ, ກະຊວງເຕັກໂນໂລຊີ ແລະ ການສື່ສານ ໄດ້ຈັດກອງປະຊຸມສຳມະນາ ວຽກງານ​ຄຸ້ມຄອງການຫັນເປັນດິຈິຕອນ, ວຽກ​ງານ​ເຕັກ​ໂນ​ໂລ​ຊີ ແລະ ການສື່ສານ ໃນຕອນບ່າຍຂອງວັນທີ 13 ມັງກອນ 2024, ທີ່ຫໍປະຊຸມແຫ່ງຊາດ ຊຶ່ງເປັນກິດຈະກຳໜຶ່ງປິ່ນອ້ອມໃນງານສັບປະດາດິຈິຕອນ (Digital Week) 2024 ໂດຍໃຫ້ກຽດເຂົ້າຮ່ວມໂອ້ລົມຕໍ່ກອງປະຊຸມຂອງທ່ານ ປອ. ສັນຕິສຸກ ສິມມາລາລົງ,​ ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ, ມີຄະນະສູນ, ຄະນະພະແນກເຕັກໂນໂລຊີ ແລະ ການສື່ສານ ແຂວງ/ນະຄອນຫຼວງ ແລະ ພະນັກງານຈາກສູນສົ່ງເສີມ ແລະ ຖ່າຍທອດເຕັກໂນໂລຊີ ເຂົ້າຮ່ວມ.

ຈຸດປະສົງຂອງກອງປະຊຸມ ແມ່ນເພື່ອສ້າງຄວາມຮັບຮູ້ ແລະ ເຂົ້າໃຈ ຕໍ່ກັບພາລະບົດບາດ, ໜ້າທີ ການຈັດຕັ້ງປະຕິບັດວຽກງານຫັນເປັນດິຈິຕອນ, ວຽກງານເຕັກໂນໂລຊີ ແລະ ການສື່ສານ ຂອງຂະແໜງເຕັກໂນໂລຊີ ແລະ ການສື່ສານ. ກອງ​ປະ​ຊຸມ​ສຳ​ມະ​ນາຄັ້ງນີ້ໄດ້​ດຳ​ເນີນ​ເປັນ​ເວ​ລາ 2 ວັນ ຊຶ່ງໄດ້​ນຳ​ສະ​ເໜີ ກ່ຽວ​ກັບ​ການ​ສົ່ງ​ເສີມ​ສ້າງ​ເສດ​ຖະ​ກິດດິຈິຕອນ (DE), ການສົ່ງເສີມລັດຖະບານດິຈິຕອນ (DG) ແລະ ການສົ່ງເສີມສັງຄົມດິຈິຕອນ (DS), ການສົ່ງເສີມສະຕາດອັບ, ການຄຸ້ມຄອງເຕັກໂນໂລຊີ ແລະ ນະວັດຕະກໍາ, ການຄຸ້ມຄອງ ແລະ ພັດທະນາເຕັກໂນໂລຊີດິຈິຕອນ, ການ​ຄຸ້ມ​ຄອງ​ອິນ​ເຕີ​ເນັດ​ແຫ່ງ​ຊາດ ແລະ ລະ​ບົບ​ໂຄງ​ລ່າງ​ພື້ນ​ຖານ, ການຄຸ້ມຄອງຄື້ນຄວາມຖີ່ວິທະຍຸສື່ສານ, ການ​ພັດ​ທະ​ນາ​ລັດ​ຖະ​ບານດິຈິ​ຕອນ, ການຄົ້ນຄວ້ານຳໃຊ້ເຕັກໂນໂລຊີອັດສະລິຍະ ທີ່ມາຈາກບັນດາກົມ/ທຽບເທົ່າ ພາຍໃນກະຊວງ ເພື່ອນຳສະເໜີ ແລະ ເຜີຍແຜ່ໃຫ້ແກ່ບັນດາພະແນກ ແຂວງ/ນະຄອນຫຼວງ ນຳໄປຜັນຂະຫຍາຍເຂົ້າໃນວຽກງານຢ່າງມີປະສິດທິພາບ ແລະ ປະສິດທິຜົນ ໂດຍສະເພາະວຽກງານການຫັນເປັນດິຈິຕອນໃຫ້ບັນລຸຕາມແຜນຍຸດທະສາດຂອງກະຊວງ ເຕັກໂນໂລຊີ ແລະ ການສື່ສານ ແລະ ຮັບປະກັນໄດ້ທັງປະລິມານ ແລະ ຄຸນະພາບ.

ພ້ອມກັນນັ້ນ, ຜູ້ເຂົ້າຮ່ວມຍັງໄດ້ແລກປ່ຽນສົນທະນາຄຳຄິດຄຳເຫັນລະຫວ່າງວິທະຍາກອນ ແລະ ນັກສຳມາກອນ ເພື່ອເສີມສ້າງວຽກງານຄຸ້ມຄອງການຫັນເປັນດິຈິຕອນ ແລະ ວຽກງານເຕັກໂນໂລຊີ ຕື່ມອີກ. ຊຶງການຈັດຕັ້ງຜັນຂະຫຍາຍວຽກງານການຫັນເປັນດິຈິຕອນ ແມ່ນພາລະບົດບາດຫຼັກຂອງຂະແໜງການ ເຕັກໂນໂລຊີ ແລະ ການສື່ສານ ທີ່ຈະຕ້ອງເປັນຜູ້ນຳໜ້າໃນການຂັບເຄື່ອນວຽກງານດັ່ງກ່າວ ແລະ ທັງໄດ້ສຸກຍູ້ສົ່ງເສີມໃຫ້ຂະແໜງການອື່ນພາຍໃນແຂວງ ແລະ ທ້ອງຖິ່ນ ຈັດຕັ້ງປະຕິບັດໃນການຫັນເປັນດິຈິຕອນ ໃນທຸກຂົງເຂດວຽກງານ.